گونئی آذربایجان قورتولوش پارتیاسینین آمئریکانین “آغ ائوی”نه اونوانلانمیش دیلکچه (پئتیتیون) ایله باغلی توتومو!
دیلکجهده، بیلر-بیلمز میللتیمیزین وار اولوشونا قارشی گؤرونن قارشیتلارا باخمایاراق اونو دستکلمک هر بیر تورک اینسانینین واز کئچیریلمز میللی بورجودور!
“آذربایجان تورک میللتی”نین گونئی سورونو ایله باغلی ایلک کز اولاراق آمئریکا-این ان اؤنملی WEB سیتهسینده بیر دیلکجه یئر آلمیشدیر. سادالادیغیمیز کیمی، بو دیلکجه میللتیمیزین وارلیغینی دوزگون ایفاده ائتمکده یئترسیز قالمیشدیر. بو بوشلوغون بیلهرکدن و یا بیلمهیهرکدن اورتایا گلمسینین گونوموز اوچون حیاتی رول اویناماماسینی دوزگون گؤرمهلی و دیرلندیرملیگیک. ایمضا سورجینین بیتمهسینه ۱۰ گون قالا، ایمضا ساییسی ۱۰ مینین آلتیندادیر. بو ایسه، ۱۰۰ میلیونلارجا تورک توپلوم و ۵۰ میلیونجا آذربایجان تورکلوگو اوچون چوخ اوزوجو بیر سونوجدور. گونئیین بو سیناودان باشی اوجا گئچمهسی گون سورونودور. گونئی، بو ایلکین میللی دیپلاماتیک ظفرینی قاچیرمامالیدیر. بیز، بیر گونئی آذربایجان ایستیقلالچی پارتیاسی اولاراق اؤنوموزده اولان بو فورصتلرین دوغرو دیرلنمهسینی ساوونور و مدافعه ائدیریک. میللی قورتولوش و ایستیقلال بیر گئجهده سونولان اولای دئییلدیر. میللی اینتیباهلا بیرلیکده آددیم-آددیم کورسللشمه و دونیا سیاسال مرکزلرینه آیاق باسماق ایستیقلال یولونون واز کئچیریلمز یؤنتملریدیر.
گونئی آذربایجان قورتولوش پارتیاسی، بو دیلکجنی حاضیرلایانلارا اؤز میننتدارلیغینی بیلدیرمکله یاناشی، دیلکجه متنینده اولان ایرانچی روحونون، تورکلرین کسین چوخلوقدا اولدوقلارینین ترسینه آزینلیق گؤستریلمهسینین، یازینین یازیلمادان اؤنجه کاردیناسسیا اولونماماسینین، میللتیمیزین اؤزللیگینی و بلیرگین یئرینین کؤلگهده ساخلانیلماسینین آلتینی چیزهرک آذربایجان میللی حرکاتی توولوسوندا بینیلمز اولدوغونو وورغولاییر. آنجاق بونلارا باخمایاراق “گونئی آدینا” بوتون تورک اینسانلارینی، اؤزللیکله آذربایجان تورکلرینی آشاغیداکی پئتیتیون مرکزینه گیریب و ایمضا آتمالارینی ایسته ییر.
عزیز میللتیمیز!
زامان دارالیر. ۲۰۱۳-۰۲-۱۲ گونوندک گونئیین گله جه یی اوچون چوخ اؤنملی اولان ۲۵،۰۰۰ ایمضا گرکیر. آمئریکا قانونلارینا گؤره، آمئریکا آازربایجانلیلاری طرفیندن یازیلان و آذربایجان تورکجهسینین آزاد اولاماسی، اینسانی و میللی حاقلارین پوزولماسی، میللی فعاللارین توتولوب ایشگنجه اولماسینی اوباما حاکمیتینه قبوللاندیرماغی اؤزلرینه هدف توتان سویداشلاریمیزی یالنیز بوراخمایاق. بو بیر نئچه نفرین شخصی ایستیی اولسا بئله، بیر میللت قونوسودور.
عزیز میللتیمیز!
گلین، میللتلشمه یولوندا آتیلان بئله میللی دیپلوماتیک آددیملاری کیچیک سانمایاق. سیویل، چاغداش، دئموکراتیک یوللارلا میللی حاقلاریمیزا چاتماغی یؤنتم سئچمیشیکسه اؤنوموزو آچاجاق فورصتلری یاندیرمامالیییق. بیز، میللی قورتولوشا وارماق آرزوسوندا اولان بیر میللت کیمی دوستلوقلارا، اولوسلاراراسی ایلیشگیلره، لوببیچیلییه و اوغورلو دیاسپورا فعالیتلرینه دال چئویرمملیگیک. ۱۹۴۶ یئنیلگینین آجی تجروبهلرینی اونوتمامالیییق. میللی ایستیقبالیمیز اوچون یؤنوموزده آشیلاجاق بؤیوک آشامالار وار. بونو باجاریب، گونئیین سورونونو ب.م.ت-نین گوندمینه گتیرملیگیک.
وار اولسون گونئیین اؤزگور دؤولتی!
محو اولسون فارسچی رئژیم!
گونئی آذربایجان قورتولوش پارتیاسی- یؤنتیم قورولو